СУД АЙТДИ ОЗОД ЭТИНГ. КИМ ҚАРШИ ЧИҚЯПТИ?

2026 йил 9 февраль куни соат 18:45 да Жиноят ишлари бўйича Фарғона шаҳар суди томонидан қабул қилинган ажрим қонун устуворлиги синови эди. Суд Фарғона вилояти ИИБ Тергов бошқармаси иш юритувидаги жиноят иши доирасида гумон қилинувчи Сохибназаров Раҳматуллога нисбатан “қамоққа олиш” тарзидаги эҳтиёт чорасини қўллаш ҳақидаги илтимосномани рад этди. Унга нисбатан “гаров” эҳтиёт чораси қўлланилди.

Қонунга кўра, суд ажрими мажбурий. У ижро этилиши шарт. Муҳокама тугади қарор чиқди. Нуқта. Маълумотларга кўра, Фарғона вилояти ИИБ ва Фарғона вилояти прокуратураси турли баҳоналар билан гумон қилинувчини озод этмаяпти. Ҳолбуки, адвокатлар ва оила аъзолари гаров пулини тўлашга тайёр. Улар белгиланган маблағни қабул қилишларини сўраб, ИИБ биноси олдида совуқ ҳавода кутиб туришибди.

Агар суд қарори ижро этилмаса, бу нафақат бир шахс тақдирига, балки бутун ҳуқуқий тизимга соя солади. Суд ҳокимияти мустақиллиги Конституция кафолати. Тергов органи ёки прокуратура суд ажримини ижро этмаслик орқали қайси ҳуқуқий асосга таяняпти?

Бу ерда гап фақат бир гумон қилинувчи ҳақида эмас. Бу ерда гап тизим ҳақида. Агар суд қарори қоғозда қолса, эртага ҳар қандай фуқаро худди шундай вазиятга тушиши мумкин. Қонун устуворлиги танлаб ишлайдиган механизм эмас. У ё ишлайди, ё ишламайди. Агар “гаров” қўлланилган бўлса, демак қамоқда ушлаб туриш учун ҳуқуқий асос қолмаган. Суд ажримини ижро этмаслик ваколат доирасидан чиқиш эмасми? Бу ҳолатга ҳуқуқий баҳо бериладими?

Жамоатчилик жавоб кутмоқда.