“ЎЛИК ЖОНЛАР” БИЛАН БОЙИГАНЛАР ҚИСМАТИ

Юкланмоқда...

Тошлоқ туманидаги оилавий боғча раҳбарининг қилмишлари нафақат жиноят, балки жамият ва болалар келажагига нисбатан қилинган энг оғир хиёнатдир. Боғча юзини кўрмаган 200 дан ортиқ болаларни ва ишламаган ходимларни киритиб, давлат хазинасига чанг солди.

Бу аёл болаларнинг ризқи бўлган 107 миллион сўмдан ортиқ субсидияни «ўлик жонлар» орқали ўзлаштириб, шахсий эҳтиёжлари учун сарфлаб юборган.

Ушбу ҳаракатлар Жиноят кодексининг 167-моддаси (ўзлаштириш) ва 228-моддаси (сохтакорлик) бўйича энг пасткаш жиноятлар сирасига киради. Аввалги «сохта қаҳрамонлар» каби, бу аёл ҳам қонунни алдадим деб ўйлади, бироқ адолатнинг қиличи унинг ниқобини парчалаб ташлади. Суд ҳукми билан у таълим тизимидан қувилди, ахлоқ тузатиш ишларига маҳкум этилди ва ўғирланган маблағлар давлатга қайтарилди.

Бу воқеа барча «уддабурон» ва сохта ниқоб кийганларга дарс бўлиши керак ҳаром луқма ҳеч қачон юқмайди ва келажакни барбод қилади. Жиноятчилар тўдасининг мантиғи ўзгармайди, лекин уларнинг ҳар бир қилмиши эртами-кечми шармандалик ва жазо билан якунланади.

Қарға баланд учгани билан ҳеч қачон лочин бўлолмайди, унинг қўниши доимо мана шундай иркит ва шармандали бўлиб қолаверади.