МАРҒИЛОНДАГИ ҚЎШНИЛАР ЖАНЖАЛИ СУДДА ЯКУНЛАНДИ!

Ҳар бир маҳаллада қўшнилар ўртасидаги муносабатлар тинчлик ва ҳамжиҳатликка асосланиши керак. Бироқ баъзан эътиборсизлик, асабийлик ва ўзаро тушунмовчилик оддий баҳсни ҳам оғир жиноятга айлантириб қўяди. Жиноят ишлари бўйича Марғилон шаҳар судида кўриб чиқилган ушбу жиноят иши ҳам айнан шундай салбий жараённинг қандай ривожланишини кўрсатади.

Иш материалларига кўра, Марғилон шаҳрида истиқомат қилувчи икки қўшни Ф.А. ва М.О. ўртасида аввалдан давом этиб келган келишмовчилик мавжуд бўлган. Ушбу зиддият дастлаб кундалик турмушдаги майда эътирозлар, жумладан кўча ҳаракати ва муомала масалалари билан боғлиқ ҳолда бошланган бўлиб, вақт ўтиши билан шахсий адоватга айланган.

2025 йил декабрь ойига келиб вазият кескинлашган. Кечки вақтда кўчада юз берган тасодифий учрашув оғзаки тортишувга сабаб бўлиб, у тез орада жанжалга айланган. Атрофдаги фуқароларнинг аралашуви ҳам вазиятни юмшатиш ўрнига, аксинча, тўқнашув кўламини кенгайтириб юборган.

Суд муҳокамаси давомида аниқланишича, Ф.А. жанжал чоғида уйига кириб, ошхона пичоғини олиб чиққан ва шу пичоқни қўллаб, М.М. исмли шахсга тан жароҳати етказган. Суд-тиббий экспертиза хулосасига кўра, ушбу жароҳат ҳаёт учун хавфли бўлган оғир тан жароҳати тоифасига киради.

Шу пайтнинг ўзида М.О. ҳам жанжалга аралашиб, атрофдаги пишиқ ғишт бўлагини қўллаб, Ф.А.нинг юз қисмига зарба берган. Натижада иккинчи томон ҳам оғир тан жароҳати олгани тиббий хулосалар билан тасдиқланган.

Суд мажлисида ҳар икки қўшнилар ўз айбларини тўлиқ тан олган. Улар содир этилган воқеадан чин дилдан пушаймон эканликларини билдириб, ўзаро ярашиб олгани ҳамда бир-бирларига нисбатан даъволари йўқлигини маълум қилишган.

Иш бўйича йиғилган барча далиллар гувоҳлар кўрсатмалари, суд-тиббий экспертиза хулосалари, воқеа жойини кўздан кечириш баённомалари ва бошқа процессуал материаллар суд томонидан ҳар томонлама таҳлил қилиниб, айбдорлик тўлиқ исботланган деб топилган.

Жазо тайинлашда суд айбдорларнинг аввал судланмагани, қилмишдан чин дилдан пушаймонлиги, тарафларнинг ўзаро ярашгани ҳамда жабрланувчиларнинг даъвоси йўқлигини енгиллаштирувчи ҳолат сифатида инобатга олинди.

Ушбу воқеа яна бир бор шу ҳақиқатни тасдиқлайдики, ҳар қандай кундалик келишмовчиликни жаҳл ва зўравонлик билан ҳал этиш инсонни оғир ҳуқуқий оқибатларга олиб келади. Қўшнилар ўртасидаги бир лаҳзали асабийлик эса бутун ҳаётга таъсир кўрсатиши мумкин.