ФАРҒОНАДА ЙҲХБ ФАОЛИЯТИ ВА ЖАМОАТЧИЛИК НАЗОРАТИ

Яқинда Фарғона вилояти ИИБ ЙҲХ бошқармасида ОАВ вакиллари ва блогерлар иштирокида матбуот анжумани бўлиб ўтди. Тадбирда соҳа раҳбарияти томонидан 2026 йилнинг тўрт ойлик якунлари бўйича рақамлар очиқланди. Полковник томонидан келтирилган маълумотларга кўра, вилоятда йўл-транспорт ҳодисалари ўтган йилга нисбатан 41,5 фоизга камайган бўлса-да, болалар ва пиёдалар иштирокидаги ўлим кўрсаткичларидаги динамикаси ўсиши кузатилган.

Энг диққатни тортадиган жиҳати атиги 4 ой ичида 200 мингдан ортиқ қоидабузарлик аниқланган бўлиб, уларнинг 60 мингга яқини қўпол қоидабузарликлар сифатида қайд этилган. Ушбу рақамлардан сўнг, "Фарғона Медиа" вакиллари сифатида муҳим ташаббусни илгари сурдик. Хусусан, Ҳайит намози ва Жума кунлари масжидлар атрофида иложсизликдан, жой йўқлиги сабабли машинасини иккинчи қаторда қолдиришга мажбур бўлган намозхонларни дарҳол жаримага тортмаслик керак.

Бизнинг таклиф бундай вазиятларда биринчи навбатда огоҳлантириш билан чегараланиш! Зеро, жазодан мақсад халқнинг чўнтагидан пул суғуриб олиш эмас, балки уларни тарбиялаш бўлиши шарт. Давлат идоралари, айниқса йўл посбонлари фаолиятидан халқ рози бўлиши олий мақсадимиздир.