FARG'ONADA KEYTERING XIZMATI ISHONCHLIMI?

Farg'onada bolalar ovqatlanishi masalasi yana keskin muhokamalar markazida. So'nggi kunlarda kuzatilgan ommaviy zaharlanish holatlari jamoatchilikni jiddiy savollar oldida qoldirdi bolalarga etkazilayotgan ovqat qanchalik xavfsiz? Nazorat qay darajada? Mas'uliyat kimning zimmasida? Har bir bog'cha oshxonasi ortida katta tizim turibdi mahsulot tanlash, tayyorlash, saqlash va etkazib berish zanjiri. Bu zanjirning bir bo'g'inidagi kichik xatolik ham og'ir oqibatlarga olib kelishi mumkin. Shu bois, bolalar ovqatlanishi bilan bog'liq har qanday holat jamoatchilikda asosli xavotir uyg'otmoqda. Aynan shu vaziyatda Farg'ona viloyatida 44 ta maktabgacha ta'lim muassasasiga ovqat etkazib berayotgan “Garden Keytering” korxonasi faoliyati diqqat markaziga chiqdi. Korxona o'z ish jarayonlarini ochiq ko'rsatish maqsadida ommaviy axborot vositalari uchun matbuot anjumani tashkil etdi.